ਆਧੁਨਿਕ ਦੌਰ ਵਿਚ ਵੰਡ ਦੇ ਯਾਦਗਾਰੀ ਸਭਿਆਚਾਰ ਦਾ ਡਿਜੀਟਲੀਕਰਨ ਹੋ ਰਿਹਾ ਹੈ। ਡਿਜੀਟਲੀਕਰਨ ਪਲੇਟਫ਼ਾਰਮਾਂ ਵਿਚ ਯੂ-ਟਿਊਬ, ਫੇਸਬੁੱਕ, ਇਸਟਾਗ੍ਰਾਮ ਆਦਿ ਉੱਪਰ ਬਣੇ ਚੈਨਲ/ਪੇਜ ਪ੍ਰਮੁੱਖ ਹਨ ਜੋ ਵੰਡ ਨਾਲ ਜੁੜੀਆਂ ਨਿੱਜੀ ਅਤੇ ਸਮੂਹਿਕ ਯਾਦਾਂ ਨੂੰ ਲੋਕਾਂ ਤੱਕ ਪਹੁੰਚਾਉਂਦੇ ਹਨ। ਡਿਜੀਟਲ ਮੀਡੀਆ ਦੇ ਸਰੋਤਾਂ ਨੇ ਕੇਵਲ ਵੰਡ ਦੀਆਂ ਯਾਦਾਂ ਨੂੰ ਵਿਸ਼ਵ ਸਾਹਮਣੇ ਪ੍ਰਸਤੁਤ ਹੀ ਨਹੀਂ ਕੀਤਾ ਸਗੋਂ ਯਾਦਾਂ ਦਾ ਇਕੱਠਾ ਕਰਕੇ ਸਾਂਭਿਆ ਵੀ ਹੈ। ਡਿਜੀਟਲ ਪਲੇਟਫ਼ਾਰਮ ਦੇ ਸਾਧਨਾਂ ਵਿਚ ਸਭ ਤੋਂ ਪਾਪੂਲਰ ਸਾਧਨ ਯੂ-ਟਿਊਬ ਹੈ, ਜਿਸ ਦੇ ਹੋਂਦ ਵਿਚ ਆਉਣ ਨਾਲ ਬਹੁਤ ਸਾਰੇ ਦਸਤਾਵੇਜ਼ ਡਿਜੀਟਲ ਤੌਰ ਤੇ ਪ੍ਰਸਾਰਿਤ ਵੀ ਹੋ ਰਹੇ ਹਨ ਅਤੇ ਉਨ੍ਹਾਂ ਨੂੰ ਵੀਡੀਓ ਜ਼ਰੀਏ ਸਾਂਭਿਆ ਵੀ ਜਾ ਰਿਹਾ ਹੈ। ਯੂ-ਟਿਊਬ ਆਉਣ ਦੇ ਨਾਲ ਇਕ ਬਹੁਤ ਪਾਪੂਲਰ ਕਿੱਤਾ ਵਲੋਗਿੰਗ ਵੀ ਹੋਂਦ ਵਿਚ ਆਉਂਦਾ ਹੈ। ਵਲੋਗਿੰਗ ਵਿਚ ਵੰਡ ਨਾਲ ਜੁੜੀਆਂ ਯਾਦਾਂ, ਕਹਾਣੀਆਂ ਕੇਵਲ ਇਤਿਹਾਸਕ ਤੱਥ ਹੀ ਨਹੀਂ ਹਨ, ਸਗੋਂ ਉਨ੍ਹਾਂ ਲੋਕਾਂ ਦੇ ਜੀਵਨ ਦੇ ਅਹਿਮ ਅਨੁਭਵ ਹਨ, ਜੋ ਉਨ੍ਹਾਂ ਨੇ ਜਾਂ ਤਾਂ ਆਪ ਹੰਢਾਏ ਹਨ ਜਾਂ ਆਪਣੇ ਵਡੇਰਿਆਂ ਤੋਂ ਗ੍ਰਹਿਣ ਕੀਤੇ ਹਨ। ਭਾਰਤ-ਪਾਕਿਸਤਾਨ ਵੰਡ ਨਾਲ ਸੰਬੰਧਤ ਯਾਦਗਾਰੀ ਸਭਿਆਚਾਰ ਨੂੰ ਪ੍ਰਸਤੁਤ ਕਰਨ ਵਾਲੇ ਵਲੋਗਰਾਂ ਵਿਚ ਸਭ ਤੋਂ ਮਸ਼ਹੂਰ ਵਲੋਗਰ ਨਾਸਿਰ ਢਿੱਲੋਂ ਹੈ, ਜਿਸ ਨੇ ਯੂ-ਟਿਊਬ ਉੱਪਰ ਆਪਣਾ ਚੈਨਲ ਹੀ ਵੰਡ ਦੇ ਦੁਖਾਂਤ ਅਤੇ ਉਸ ਸਮੇਂ ਆਪਣਿਆਂ ਤੋਂ ਵਿੱਛੜੇ ਲੋਕਾਂ ਨੂੰ ਮਿਲਾਉਣ ਲਈ ਬਣਾਇਆ ਹੈ। ਉਹ ਆਪਣੇ ਚੈਨਲ ਦੀ ਵਾਲ ਤੇ ਆਪਣਾ ਮਕਸਦ ਲਿਖ ਕੇ ਸਪਸ਼ਟ ਕਰ ਦਿੰਦਾ ਹੈ ਉਸ ਦਾ ਮਕਸਦ ਲਹਿੰਦੇ ਅਤੇ ਚੜ੍ਹਦੇ ਪੰਜਾਬ ਦੇ ਵਿੱਛੜੇ ਹੋਏ ਲੋਕਾਂ ਨੂੰ ਆਪਣਿਆਂ ਨਾਲ ਮਿਲਾਉਣਾ ਹੈ। ਉਹ ਆਪਣੀ ਵਲੋਗਿੰਗ ਦੁਆਰਾ ਲਹਿੰਦੇ ਪੰਜਾਬ ਦੇ ਸਭਿਆਚਾਰ ਨੂੰ ਤਾਂ ਪ੍ਰਸਤੁਤ ਕਰ ਹੀ ਰਿਹਾ ਹੈ ਉੱਥੇ ਨਾਲ ਹੀ ਵੰਡ ਦੇ ਯਾਦਗਾਰੀ ਸਭਿਆਚਾਰ ਦਾ ਸੰਚੈ ਕਰਨ ਦੇ ਨਾਲ-ਨਾਲ ਉਸ ਦਾ ਵਿਸ਼ਵ ਪੱਧਰ ਉੱਪਰ ਪ੍ਰਸਾਰਨ ਵੀ ਕਰ ਰਿਹਾ ਹੈ। ਦੇਸ਼ ਵੰਡ ਦੇ ਦਰਦ/ਯਾਦਾਂ ਨੂੰ ਪੇਸ਼ ਕਰਦੇ ਢਿੱਲੋਂ ਦੇ ਵਲੋਗ ਦੋਵਾਂ ਦੇਸ਼ਾਂ ਦੇ ਨਾਗਰਿਕਾਂ ਵਿਚ ਸਮਾਜਕ ਅਤੇ ਸਭਿਆਚਾਰਕ ਸਾਂਝ ਦੁਬਾਰਾ ਤੋਂ ਪੈਦਾ ਕਰਨ ਵਿਚ ਸਹਾਇਕ ਹੋ ਰਹੀ ਹੈ।