Abstract: মালেমসিদা খুন্দা-লৈতারিবা মীওই ফুরুপ কয়ানা মাগী মাগী ফুরুপতুগী মরমদা ইবা ৱারোল কয়া থম্নৈ। ইদুনা থম্লিবা ৱারোলসিং অদু তোঙান তোঙানবা হীরমসিংগী মতাংদা ওইবা য়াই। ‘চৈথারোল কুম্বাবা’ মণিপুরী/মীতৈ ইপা-ইপুসিংনা থম্বীরম্বা মমল য়াম্লবা লাইরিক অমনি। লাইরিক অসি রোয়েল ক্রোনিকল অমনি হায়না সকখংনৈ। চহী লিসাং সিৎনা চৎথরক্লিবা মণিপুরগী পুৱারীদা পানখিবা নিংথৌসিংনা করম করম্বা চহীদা নিংথৌ খুবম কাখিবগে, কয়া কুইনা পাল্লম্বগে, করম করম্বা মফমসিংদা লান্দারুবগে, ঙমলকপগে, লানফা ওইনা কয়া য়াম্না ফারকপগে, মণিপুরদা করম করম্বা মফমদগী মীওইসিং লাকখিবগে, চৎখিবগে হায়বনচিংবা থোকখিবা থৌদোকসিং ইসিন্দুনা ‘কুম্বাব’দা রেকোর্দ তৌরম্মী। লাইরিক অসিদা রেকোর্দ তৌরিবসি খৃঃ ৩৩ দা ফম্বাল কাখিবা নোংদা লাইরেন পাখংবদগী হৌরগা খৃঃ ১৯৪১ দগী খৃঃ ১৯৫৫ ফাওবা নিংথৌ ওইখিবা মহারাজ বোধচন্দ্রসিংহগী হাকথক ফাওবনি। ক্রোনিকল অসিদা কৈ ফাবগী, কৈনা চীক্তুনা মীসি-মীনা থোকপগী, শজি ফাবগী, শঙাই ফাবগী লোয়ননা মণিপুরদা শামু পুসিল্লকপগী, শামু তানবা চৎপগী, শামু ফাবগী, শামুনা সোক্তুনা মীসি-মীনা থোকখিবগী থৌদোক কয়াগী মরমদসু রেকোর্দ তৌরম্বা থেংনৈ। চৈথারোল কুম্বাবাঃ মণিপুরদা শামু পুসিল্লকপা অমদি ফাবগী থৌদোকসিং হায়বা পেপর অসিদা নিংথৌ কনা কনাগী হাকথক্তা মণিপুরদা শামু পুসিল্লকখিবগে, করম করম্বা মফমদগী শামুসিং ফারুবগে অমদি কয়া য়াম্না ফারকপগে হায়বনচিংবগী মরমদা থম্নবা হোৎনরি।