এব্‌সত্রেক্ট : মালেমসিদা মখল মথেলগী ওইবা লোন মসীঙ লিসিং মঙাগী মথক্তা ঙাংন-সানদুনা অহিংবা লোন ওইনা লৈরি হায়না লোনগী মরমদা থিজিনবা, নৈনবসিংনা থম্লিবা লোনসিং অদুগী মনুংদা মণিপুরীসু অমনি। মালেমসিদা ঙাংন-সানরিবা লোন খুদিংমক্কী মসা মসাগী ওইবা স্ত্রকচর লৈজরিবা অদুগুম্না মণিপুরীগীসু মসাগী ওইবা স্ত্রকচর তোঙান্না লৈজৈ। মসীঙ থিবা য়াবা পোৎলম চৈরমসিং- নাউন অমদি প্রনাউনসিংবু মসীঙ অমনি নৎত্রগা অমদগী হেনবনি হায়না খঙহল্লিবা অদুবু নম্বর হায়না খঙনরি। নম্বর হায়বসি অমতমক খঙহনবা (singular number) অমদি ময়াম খঙহনবা (plural number) হায়দুনা অনী থোক্না খায়দোকই। মণিপুরীগী ওইনা সিঙ্গুলর নম্বর খঙহনবা মতমদা নাউন নৎত্রগা প্রনাউনগী ৱাহৈ অদুতমক থম্মী নৎত্রগা ‘অমা’ হায়বা তর্ম অসি তপ্পী। ‘সন’, ‘অঙাং’, ‘তেবল’, ‘ঐ’, ‘নং’, ‘মা’, ‘সন অমা’, ‘অঙাং অমা’, ‘তেবল অমা’ অসিনচিংবা নাউন অমদি প্রনাউনগী ৱাহৈসিং অসি মণিপুরী লোনগী সিঙ্গুলর নম্বরগী খুদমসিংনি। পীরিবা সিঙ্গুলর নম্বরসিং অসিদা সফিক্স তপতুনা নৎত্রগা অকক্নবা অমদগী হেনবা মসিং হাপতুনা প্লূরেল নম্বর সেম্মী। ‘সনসিং’, ‘সন মঙা’, ‘তেবল নিপান’, ‘অঙাং মরী’, ‘অঙাংসা‘ ‘ঐখোয়’, ‘নখোয়’, ‘মখোয়’নচিংবসিং অসি মণিপুরীগী প্লূরেল নম্বরসিংনি। মণিপুরীদা প্লূরেল নম্বর সেম্বগী পথাপ পরিং তোপ তোপ্না লৈজৈ। লোন অসিদা প্লূরেল নম্বর করম্না সেম্বগে হায়বদু “মণিপুরী লোন্দা প্লূরেল নম্বর (Plural Number) সেম্বগী মওং” হায়বা পেপর অসিদা থম্নবা হোৎনরি।