এবষ্ট্রেক্ট : মালেমদা লৈরিবা সাহিত্য খুদিংমক্কী মতৌগুম্না অঙাংগী সাহিত্য অসিসু চীনবুং সাহিত্য (Oral literature) দগী হৌরকখিবনি । মমাংঙৈ লাইরিক-লাইশুগী মঙাল ফংদ্রিঙৈ মতমদা য়ূমগী অহল ওইবশিংনা মশুশিংবু কৌশিল্লগা ৱারী লীবগী চৎনবী অসি জাতি খুদিংমক্কী অমদি মফম খুদিংমক্তা উবা ফংই । লাইরিক লাইশু তম্বগী চৎনবী লৈত্রিঙৈ চীনবুং ৱারীনা অঙাংশিংবু লৌশিং-জ্ঞান হেনগৎহল্লি অমদি মখোয়গী তুংগী পুন্সিদা কান্নবা কয়া অমা ফংহল্লি । মহৌশানা ৱারী তাবা হায়বসি অঙাংশিংনা য়াম্না পাম্নৈ । মখোয়না শা-ঙা, উচেক্কী ৱারী, লাই-তিনগী ৱারী, হেলোয়গী ৱারী, নিংথৌগী ৱারীনচিংবসি য়াম্না পামজৈ । অসিম্না চীনবুং ৱারীশিং অসিনা মথং মথং শমথরক্তুনা ঙসি ফাওবদা চৎনবী অমা ওইদুনা লৈরি । হায়রিবা চীনবুংগী ৱারী অসিদগী অঙাংগী সাহিত্য মমি তম্বা হৌখিবনি হায়বা য়াই । লাইরিক-লাইশু তম্বগী চৎনবী লৈরকলবা মতুংদগী অঙাংগী তম্ন-লাইরিক পুথোক্নরকখি । তম্ন-লাইরিক পুথোরকপদগী লাইরিক হৈবা মীওই কয়া অমসু থোরকখি অমদি সাহিত্যগী হীরম অসি য়াম্না মরুওইবা অমনি হায়না খন্নরকপদগী অঙাংগী মরমদা কূপ্না থিজিনবা অখঙ-অহৈ কয়া থোরক্তুনা স্কুলগী পারা খক্তনা অঙাং অমবু অফবা লম্বীদা লমজিংবা ওইথোক্তে খঙনরকখি । মসিদগী তপ্না তপ্না অঙাংগী সাহিত্য থোরকপা হৌরকখিবনি হায়বা য়াই । অঙাংগী সাহিত্য অসি করম্বা মতমদগী ইহান হান্না থোরকখিবগে হায়বসিগী চপ চাবা মতম কনানসু খঙবা ঙমদ্রি । অদুবু সাহিত্য অসি ১৭শুবা চহীচাগী মমাংদগী য়ুরোপ্তা লৈরকলবনি হায়না লৌনৈ । মশক নাইবা অঙাংগী লাইরিক থোরকখিবদি ১৮শুবা চহীচাদগীনি ।