এবস্ট্রেক্ট :  ড্রামাতিক আইরনি হায়বসি সাহিত্যগী পোত্থোক নৈনবদা অমসুং সাহিত্যগী মফজগী চাং ওনবদা শীজিন্নবা লিটেরেরী টার্ম অমানি । লোয়ননা ড্রামাদা য়াম্না তোয়না শীজিন্নবা টেকনিক অমসুনি । ড্রামাটিক আইরনি হায়বসি ওন্ন-তৈন্ননা থোকহনবা থৌদোক মখল অমনি । করিগুম্বা ড্রামা অমগী ৱারী পরিংদা চুমদ্রিং চৎথরক্লিবা অমদি মদুগী তান্নরিবা নৎত্রগা ফংগদৌরিবা ফল অদুগী ওন্ন-তৈনবদা থোক্লকপা থৌদোক, তাইয়োন্নবা ফল ফংবা অদুনি । মসিগী মতেংনা ড্রামা ইবনা য়েংলিবা ভাবকশিংনা লীলা অদুগী মনুংদা ঙাঙলিবা, থোক্লিবা থৌদোক পূম্নমক অদু মখোয়গী হান্ননা খঙজরবা জ্ঞানগী খনদা ওন্দুনা অচুম-চুমদনচিংবগী নৈনজবা য়াবগী খূদোং চাবদু শোয়দনা পী । মরমদুনা ট্রেজিক প্লেশিংদদি ড্রামাতিক আইরনিগী টেকনিক অসি য়াম্না মরু ওইবা খূৎলাই অমনি । ড্রামাতিক আইরনিদি ‘a type of irony where the reader or audience knows something that the characters do not, resulting in increased tension.’ হায়না শকতাকপা য়াই । ড্রামাতিক আইরনি হায়বসি আইরনি মখল অমনি । হায়রিবা ড্রামাতিক আইরনিগী টেকনিক অসি সোফোক্লেসকী “আন্তিগোনে” হায়রিবা ট্রেজিক প্লে অসিদা মায়পাক্না শীজিন্নৈ । টেকনিক অসিনা “আন্তিগোনে” লীলাবু ট্রেজেদি ওইহনবদা চাউনা মতেং পাংই ।